މޫސުމާބެހޭ އިދާރާ (މެޓް އޮފީހުގެ) ހިދުމަތް މި އަތޮޅު މާފަރު އިންޓަނޭޝަނަލް އެއާޕޯޓުގައި މިދިޔަ މަހު ރަސްމީކޮށް ފަށާފައިވާއިރު، މިއީ މި ނޫނަށާއި ހާއްސަ މި ސަރަހައްދުގެ ވައިގެ ދަތުރުފަތުރާއި އިގްތިސާދަށް ލިބިގެންދިޔަ ވަރަށް ބޮޑު ކުރިއެރުމެކެވެ.
މެޓް އޮފީހުން ބުނި ގޮތުގައި މާފަރުގައި ފަށާފައިވަނީ "އެވިއޭޝަން މީޓިއޮރޮލޮޖިކަލް" ހިދުމަތްތަކެވެ. މިއީ މާފަރު އިންޓަނޭޝަނަލް އެއާޕޯޓަށް ބޭނުންވާ މޫސުމީ މައުލޫމާތު ނުވަތަ "ވެދާ ސަޕޯޓް" ފޯރުކޮށްދިނުން އިތުރަށް ހަރުދަނާކޮށް، ވައިގެ ދަތުރުފަތުރުގެ ސަލާމަތާއި ރައްކާތެރިކަން ކަށަވަރުކުރުމަށް އެޅުނު ވަރަށް މުހިންމު ފިޔަވަޅެކެވެ. މާފަރުގައި މި އޮބްޒަވޭޓަރީ ގާއިމްކުރުމުގެ މަސައްކަތް މެޓް އޮފީހުން ކުރިއަށް ގެންދިޔައީ އެއާޕޯޓު ހިންގާ އައިލެންޑް އޭވިއޭޝަނާ ގުޅިގެންނެވެ.
މާފަރުގައި އޮބްޒަވޭޓަރީއެއް ހުރުމުގެ މުހިންމު ފައިދާތައް
މިއީ ރާއްޖޭގައި ގާއިމްކުރި މޫސުން ބަލާ 6 ވަނަ އޮބްޒަވޭޓަރީ އެވެ. މި މަރުކަޒުގެ ސަބަބުން ނޫނު އަތޮޅަށާއި މުޅި ސަރަހައްދަށް ކުރާނޭ ފައިދާ ތަކަކީ:
- ވައިގެ ދަތުރުފަތުރުގެ ރައްކާތެރިކަން ކަށަވަރުވުން: މާފަރަކީ ގިނަ އަދަދަކަށް އިންޓަނޭޝަނަލް ފްލައިޓްތަކާއި ޕްރައިވެޓް ޖެޓްތައް ޖައްސާ އެއާޕޯޓެކެވެ. މި ސަރަހައްދުގެ މޫސުން ވަގުތުން ވަގުތަށް (ރިއަލް-ޓައިމްކޮށް) އެނގުމަކީ ޕައިލެޓުންނަށް ފްލައިޓްތައް ރައްކާތެރިކަމާއެކު އޮޕަރޭޓްކުރުމަށް ލިބޭނެ ވަރަށް ބޮޑު ލުޔެކެވެ.
- ފަތުރުވެރިކަމަށް ލިބޭ ކުރިއެރުން: ނޫނު އަތޮޅަކީ މަތީ ފަންތީގެ ރިސޯޓުތައް ގިނަ އަތޮޅެކެވެ. ސީޕްލޭން އޮޕަރޭޝަންތަކަށް ޞަރީޙަ މޫސުމީ މަޢުލޫމާތު ލިބުމަކީ ދަތުރުތައް ޑިލޭވުން ކުޑަކޮށް، ފަތުރުވެރިންނަށް ފަސޭހަ އަދި ރައްކާތެރި ދަތުރުތަކެއް ކަށަވަރުކޮށްދޭނެ ކަމެކެވެ.
- މަސްވެރިންނާއި ކަނޑުދަތުރުކުރާ ފަރާތްތަކަށް ސީދާ މައުލޫމާތު ލިބުން: ކުރިން އުތުރުގެ މޫސުން ބިނާކުރަމުން އައީ ހދ. ހަނިމާދޫ ސްޓޭޝަނަށެވެ. ނަމަވެސް މާފަރުގައި ހިދުމަތް ފެށުމުން، ނޫނު އަތޮޅާއި ކައިރި އަތޮޅުތަކުގެ ކަނޑުތަކުގެ ހާލަތާއި ވައިގެ މިސްރާބު މާބޮޑަށް ސީދާކޮށް (އެކިއުރޭޓްކޮށް) އަންދާޒާ ކުރެވި، މަސްވެރިންނަށް މޫސުމަށް ސަމާލުވުމަށް ފަސޭހަވެގެންދާނެއެވެ.
- ބައިނަލްއަހުވާމީ މިންގަނޑުތަކަށް ފެތުން: މި އޮބްޒަވޭޓަރީ ޑިޒައިންކޮށްފައިވަނީ އދ. ގެ ދުނިޔޭގެ މޫސުމާބެހޭ ޖަމިއްޔާ (ޑަބްލިއުއެމްއޯ) ގެ "ގްލޯބަލް ބޭސިކް އޮބްޒަވޭޝަން" މިންގަނޑުތަކާ އެއްގޮތަށެވެ. މީގެ ސަބަބުން ދުނިޔޭގެ މޫސުމީ ނެޓްވޯކުގައި މާފަރުގެ ނަން ވިދާލައި، ރާއްޖެއިން ފޯރުކޮށްދޭ ޑޭޓާގެ ފެންވަރު މަތިވެގެންދާނެއެވެ.
މަޝްރޫއުގެ ފަސްފަހަތް
މާފަރުގައި މޫސުން ބަލާ އޮބްޒަވޭޓަރީއެއް ހެދުމުގެ މަސައްކަތް ފަށާފައިވަނީ ޖޫން މަހުގެ ކުރީކޮޅުގަ އެވެ. މި މަސައްކަތަކީ ޔުނައިޓެޑް ނޭޝަންސް މަލްޓިޕާޓީ ޓްރަސްޓް ފަންޑް (ޔޫއެންއެމްޕީޓީއެފް) އާއި ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) ގުޅިގެން އުފައްދާފައިވާ "ސިސްޓަމެޓިކް އޮބްޒަވޭޝަން ފައިނޭންސިން ފެސިލިޓީ" ގެ ދަށުން މިދިޔަ އަހަރު ފެށި ބޮޑު ޕްރޮޖެކްޓެއްގެ ތެރެއިން ކުރެވުނު ކަމެކެވެ.
މެޓް އޮފީހާއި ޔޫއެންއީޕީ ގުޅިގެން 4 އަހަރު ދުވަހުގެ މުއްދަތަށް ހިންގާ މި ޕްރޮޖެކްޓުގެ ދަށުން:
- ރާއްޖޭގައި މިހާރު ހުރި 4 މެޓް އޮފީހެއްގެ މޫސުމާބެހޭ އާލާތްތައް ޒަމާނީ ފެންވަރަށް އަޕްގްރޭޑް ކުރެވޭނެ
- އައްޑޫ ގަމުގައި ހުންނަ ވައިގެ މަތީ ފަށަލަތަކުގެ މަޢުލޫމާތު އެއްކުރާ ނިޒާމު "ރޭޑިއޯސޮންޑޭ" މަރާމާތުކޮށް އަލުން ބޭނުންކުރަން ފެށޭނެ
މާފަރުގައި މި ހިދުމަތް ފެށުމުގެ ކުރިން ރާއްޖޭގައި މޫސުން ބަލާ މައި އޮބްޒަވޭޓަރީތައް ހުންނަނީ ހުޅުލެ، ހދ. ހަނިމާދޫ، ލ. ކައްދޫ، ގދ. ކާޑެއްދޫ އަދި ސ. ގަމުގަ އެވެ. މީގެ އިތުރުން މޫސުން ބަލާ އޮޓޮމޭޓެޑް 20 ސްޓޭޝަނާއި، ދިޔަވަރު ބަލާ 3 ޓައިޑް ސްޓޭޝަން (ހަނިމާދޫ، ހުޅުލެ، ގަން) ރާއްޖޭގެ އެކި ކަންކޮޅުތަކުގައި ގާއިމްކޮށްފައިވެ އެވެ.
